|
« NEŦŦEF-D TAQERNIT »
Bunadem m’ ifat meqqwer,
Temẓi-s m’ ad tt-id-ifekker,
Ad ittwali lexyalat
Akken ibγa iγzif leεmer,
D ayen ibanen iḍher,
Iruḥ lweqt-is iğa-t
Si zik neŧŧef-d taqernit,
S nnif akw d tfenŧazit,
Seg wul zeddigen amm aman.
Ayen i daγ-d-teǧa tnaṣlit,
S wayen i nezmer nqesḍ-it,
Nettseggim-as iberdan.
W’illan d lfahem ifehm-it,
Seg wasmi tebda ddunit,
Kulci ijebbed s iẓuran...
Lḥeq d ṣṣwab neqqar-it,
Ma d lbaŧel nkerh-it,
Lwaldin, akka i γ-weṣṣan.
Nessefruy γef ddunit,
Nettfekkir-d tajaddit,
Akw d wayen i γ-d-ğan.
Nettγenni s teqbaylit,
Kul awal newzen-it,
S lemtul d lmeεnat ilhan
llsas neswejd-it,
Armi d ṣṣeḥ neṣṣaweḍ-it,
Nesḍehr-ed dges iẓuran.
Ayen i nessaweḍ nexdem-it,
Leεtab illan neqbel-it,
A nkemmel akka kra n wussan.
Ma teqdef-aneγ-d ddunit,
Iḍher mazal taṣebḥit,
I ljil mazal d ameẓyan...
Bunadem m’ ifat meqqwer,
Temẓi-s m’ a tt-id-ifekker,
Ad ittwali lexyalat
Akken ibγa iγzif leεmer,
d ayen ibanen iḍher,
Iruḥ lεeql-is iğa-t
|
