A taqbaylit, a tigejdit !
A tin γef ibna uxxam;
Ṣṣbaḥ, tameddit,
Argaz weṣṣi-t!
In’ as ad iddu s lewqam !

D kemmini i d tigejdit
F tebna ddunit;
Γurem akw i d-cudden isulas,
Γurem i d-tsenned tkufit
D ucbayli n zzit;
D kemmin i d aɛessas
Ma illa rray-im d iri-t
Ur treṣṣ’ ara tgejdit ,
Kulci ad irab ar llsas.

Kulyum weṣṣi argaz-im,
Yess-im d warraw-im!
Mel-asen iberdan ilhan!
Jerreb kan deg yiman-im!
Akken illa uxxam-im
I llan ula d ljiran.
Kkes tismin seg wul-im !
Lhi-d kan d ccγwel-im !
Ad tilim akw di laman !

Weṣṣi-ten yiwen yiwen!
Melmi ttun fekker-iten!
Mel-asen ṣṣwab d lmeɛqul!
D acu d lfayda n yiɛdawen
Bexlaf imeṭṭawen?
Lxuf d lehlak n wul,
Akken nella d imdamen.
Yak Rebbi-nneγ akw yiwen,
Mkul taswaɛt aγ-d-ittmuqul!

Tixer i ẓẓur akw d lmenkwer,
Lebγeḍ akw d lekwfer!
Beɛd si mkul lebliyya!
Ur ttqezzib ur ḥeqqer!
Mkul wa efk-as leqder!
Ilha lxir akw d nniyya.
Ma illa terniḍ ṣṣber
Ad yilli fellam sser
Anga teddiḍ d lɛafya.